حررنى
من صوره انا فيها خيال
من حلم تحقيقه محال
من وهم عشته فى حبى ليك
من جرح بقى فوق الاحتمال
انا كنت فاكراك طوق نجاه
وقلت دا قدرى ونصيبى
ولاقيت هواك زى الحياه
فى نهايته موت ياحبيبى
كان كل حلمى قلبين وبيت
فى الحب يتهنوا سوى
كان حلم عادى سهل و بسيط
كان حلم واهو طار فى الهوى
الفجر لاح ونور الصباح
شقشق على نهارنا الوليد
هنفترق لكن انا
بتمنى تبدأ من جديد
وتلاقى حب تكمله
وقلب لما تسأله
هتعيش معايا ؟
يرد طبعا ياحبيبى
ده شىء اكيد
لكن انا هفضل هنا
مع شهريار والسيف على
حكايتى الوحيده
يمكن مشفش تانى النهار
او اعيش معاه حكايه سعيده
يمكن ويمكن ومع الف يمكن
يفضل سؤال
امتى تحررنى عشان
انا سجنى طال
6 comments:
عوده محموده اٍن شاء الله بعد طول غياب و لعل كان المانع خير ..
معاكى اٍن الحب أحيانا (مش أحيانا لكن غالبا يعنى) بيكون مطلوب فيه التنازل باٍرادة الشخص نفسه عن حريته كامله لمن يحب ..
لكن لأى مدى سيقدر الآخر هذه التضحيه اللى بيضحى بيها الحبيب عن طيب خاطر لمحبوبه ؟؟
لأى مدى ؟؟
هل سيستغل هذه التضحيه و يظل يضغط على حبيبه و يضغط لحد ما ينفجر فيه و يبقى ده أول مسمار فى نعش الفراق و لا حيحصل العكس ؟؟
سؤال أنا ما لاقيتش له أى اٍجابه منطقيه !!
تقبلى تحياتى و تقديرى ..
ميرسى جدا يااستاذ عمرو اولا على اهتمامك وانا الحمدلله بخير يمكن الايام اللى فاتت شهدت تطورات واحداث فى حياتى اثرت عليا وكانت سبب فى الغياب كنت بكتب كتير بس فى نص الموضوع كانت بتوه منى الكلمات وبيضيع الاحساس فبتوقف ومبكملش .. مبعرفش اكمل شىء مبقتش حساه .. ثانيا شكرا على متابعتك للى بكتبه ده فى حد ذاته شىء بيشرفنى جدا وبسعد بيه فعلا .. المشكله ان فى الحب بيبقى مكتوب على طرف احيانا انه يضحى مش المشكله انى يضحى المشكله ان الطرف التانى يتعود منه على كده وكأنه اصبح واجب عليه .. طيب لو حبيبك ده مقدرش واحيانا التضحيات المطلوبه بتبقى فوق الاحتمال هل كده معناه ان الحب ينتهى او نحكم عليه انه حب ضعيف مقدرش يواجه الظروف .. انا رايى مفيش حاجه اسمها تضحيه في الحب لازم الطرفين يتحملوا المسئوليه لازم الاتنين يفكروا يسوى وياخدوا قرارات مشتركه .. مش لازم طرف يسيب التانى يتصرف فى كل شىء ويستنى النتائج .. وفى الاخر القلوب بتتقلب ومن كده جه اسمها والحب احيانا ممكن يموت بكره وحب تانى يتولد منه المهم ان كل شىء قسمه ونصيب احنا محتاجين بس نفكر شويه بعقلنا قبل ما نتصرف باحساس مندفع يمكن فى النهايه نكتشف انه وهم ونندم عليه
سأكتبك الليلة في فصلي الأخير من المسرحيه
وسأودع بك ذكريات ليالينا النرجسيه
ستكونين أنت البطله
وسأكون ذلك الظالم القاسي
الليله سيبكي هذا القلم العزيز
جراحاً
هموماً
دموعاً
من عيونك العسليه
أنا
ورقة الحب الأخيره في الفصل الأول منها
وأنت
كل فصولها الرومانسيه
اقف انا هنا خلف الكواليس
ارى بعينى تلك الصرخات
تأخذنى بعض العبارات
واتوه احياناً بين الكلمات
يمزقنى نغمك الحزين
ويدمى فؤادى بعض الدموع
سيدتى
لم تنتهى المسرحية بعد
اين فصولى
فدعينى اعلن عن وصولى
دعينى ابعد عن ارضك هذا الخيال
دعينى اداوى هذه الجراحات
دعينى امسح دمع الماضى
واغلق الستار على فصول الاحزان
وافتح لكى ابواب الافراح
يا اميرتى انا فارسك تعالى
وبعثرى
ذكراكى المؤلمه على بابى
سيدتى
ابحثى عنى فأنا فى انتظارك
هنا خلف الكواليس
Khaled
Admiral
كلماتك جميله ورائعه ياادميرال ولكن لاعجب ان كانت منك فانت صاحب القلم وسيده وانت معشوق الكلمات واميرها ..
اول مره ادخل المدونه الجميله دي
الحقيقه لاقيتها في القايمه عند عمرو
قلت اكيد تستاهل
وفعلا لاقيتها تستاهل
القصيده جميله
اول مره اشوف لحظة ضعف بالقوه دي
بس عايزه ارد علي عمرو
ماهو مفهوم الحريه اللي هيتنازل عنها الحبيب لحبيبه
مش فهماها
هو الحبيب هيسجنه بجد مش فهماها خالص
هو الحب قيد وسجن
التضحيه في الحب بتكون في ايه مش فهمه
لو اتنين بيحبوا بعض اي شئ بيعملوه بيكون المصلحه فيه واحده
يعني لو الحبيبه ضحت بالشبكه علشان يقدروا يدفعوا مقدم الشقه ماالشقه دي هيقعدوا فيها مع بعض وهتقرب بينهم
بس كمان لازم الحبيب يقدر ده
ماتضحيش هي بالشبكه وهو يروح يجيب موبايل غالي والا يغير عربيته
بحس ان المفروض اي فعل في الحب بيكون لخدمة الحب نفسه
ولو احد الاطراف ابتدي يقول انا عملت والا ضحيت
هنا بداية السقوط
والفراق الفعلي
اخر سطرين بجد جمدين جدا
بس عايزه اقول ان مافيش حد بيحرر حد
اللي عايز يتحرر بيحرر نفسه
بس لو قدر علي الفراق
ساعات كتير برغم اليقين من ان الاستمرار صعب
بيكون الاصعب اتخاذ القرار
في النهايه ومعلش طولت
القصيده جميله جدا جدا
تسلم ايدك
بجد مش عارفه اقول ايه ليكى ياشمس النهار يمكن هبدأ بشكر خاص للاستاذ عمرو لانه كان السبب فى زيارتك لمدونتى البسيطه ومرورك الكريم اسعدنى جدا ولكن ما اسعدنى حقا ردك الرائع عن مفهوم الحريه فى الحب اتفق معكى تماما
شكرا لكى مره اخرى واتمنى ان تسعدينى دوما بهذا النقاش الهادف
Post a Comment