تصبحى على خير يا مصر

حبيت اتكلم واصرخ واعلى صوتى واحرر نفسى من خوفى ومن سكوتى حبيت اكون انا مش حد تانى

واعيش زى ما احب يازمانى حبيت زى البنات حلم الفرح والطرحه بيضا بلون فستانى حبيت انا ابن الجيران سافر عشان يبنلنا بيت سنه واتنين تلاته خلاص هوه نسى وانا نسيت وقلت ياريتنى ماحبيت ورجعت للصندوق ادور على البوم صورى الصغير بتاع زمان ايام ما كان القلب لا تعب واتحير وفى وسط توهة ذكريات قررت اتخلى عن الماضى وعن كل اللى فات ما انا لسه بنت العشرينات نصحونى قالوا العلم سلاح واخترت مشوار الكفاح ومشيت مشيت وعمرى ما كليت ولا مليت ونجحت بين الصحاب وبقيت نجمه تنور فى السما ومعايا شهادات انما على الارض مالهاش الا صيت فين النظام والاحترام

روتين بيخنق فى اللى باقى من السنين وبيخنق الاحلام حرام والله حرام مش دى الحكايه يامصر اللى سمعتها من جدتى مش دى نهاية قصتى هموت عليكى ودايبه فيكى وشكوتى منك اليكى ومهما كان انا بنت ارضك وان سبت ارضك غصب عنى متخافيش انا راجعه ليكى بس حبيت اشتكيلك هوه انا مش بنت نيلك هوه انا ع الارض دى كان ليا غيرك ولا تحلى الفضفضه الا فى حضن ليلك تصبحى على خير يامصر