جريت على باب الوزيرونزلت دق
الباب نطق غور يافقير
بطـل قلــق
ايه اللى جاب رجلك هنــا
رديت انا حقى اتسرق
وجيت اقدم شكوتى
وكله مثبوت ف الـورق
تلاتين سنه بشقى وبتعب
ودمى والله اتحــرق
لقيت معاشى المنتظر
مايشتريش اكله فى طبق
مع انهم خصموا كتير
وقالنا سيادة الوزير
وحلفلنا بمــن خلــق
انو هيدينا حقوقنا
وما حد يسمع او يشوف
ضحك وقاللى ماتتفلق
مزاج سيادته مش تمام
سألت انا وإيــه السبب؟؟
بدموع وتنهيده يقولى
حصانه خسران فى السبق
؟!!!!!
1 comment:
ههههههههههههههه
عندك حق و الله
بمناسبة الوزراء بقى
اعـلان لاسكـان الشـبـاب
بـدد ظـلام اليـأس نــور
أغـرى قامـوس الأمنيـات
يحضن بشوق كلمـة مهـور
اعلان بشقة فى الجمـال
زى الفلـل زى القـصـور
قلـت لحماتـى اتبـغـددى
بنتـك هتتجـوز "كـافـور"
الـفـرح نــور قلـبـنـا
والعـش هيـلـم الطـيـور
دبـرنـا سلـفـه وبعـدهـا
طرنـا علـى بنـك العبـور
وهنـاك يفاجئونـا بشـر
بينها وبيـن أحلامنـا سـور
وتموت ف لحظـة فرحتـى
وأصرخ بحرقة ميـن يثـور
أصـل الوزيـر مـش مننـا
ولا يوم وقف عالعيش طابور
ولا عمره بات من غير عشا
ولا داء صوم من غير فطور
أسأل يـا بيـه عـن دخلنـا
واربط شروطـك بالأجـور
غول البطالة والغلا
والواسطة لـسـه جــواز مــرور
ولحـد امتـى يـا وطــن
هنعيش على فتات الصقـور
تـبـدأ مـراحـل تنتـهـى
وتفوت شهور وتفوت دهـور
وحماتـى تـنـدب حظـهـا
دا البنـت لـو تكبـر تبـور
واسمـع نهـايـة قصـتـى
مأساة ..دراما ..ظلم .. زور
فاجئونـى بعـد تحـريـات
ان اسمى مش بين السطـور
شفت الكشوف قلت بصحيـح
دا اللى اختاروه قرب يغـور
دول نصهم ضهـره انحنـى
للآخـرة مستنـى العـبـور
يعنى الأمل أصبـح سـراب
يعنـى الحيـاة زى النشـور
يبقـى الحكايـة باختـصـار
احجز مكانـك فـى القبـور
Post a Comment